बिलासपुर । हाईकोर्ट ह बिल्हा के पूर्व एसडीएम अर्जुन सिंह सिसोदिया के प्रताड़ना ले राजेन्द्र तिवारी के खुदकुशी व जेल म जीवनलाल के मउत के मामला म पेश याचिका म सुनवाई आगे बढ़ा दिस हे।
बिल्हा निवासी कांग्रेस के युवा नेता राजेन्द्र तिवारी के खिलाफ पुलिस ह धारा 107, 116 के तहत एसडीएम के समक्ष चालान पेश करे रिहिस हे । मामला म एसडीएम जमानत बर रुपया के मांग करके वोला प्रताड़ित करत रिहिस हे । आए दिन वारंट तामील करे जाए ले परेशान होके वोहा एसडीएम कार्यालय के सामने आग लगाके खुदकुशी कर लिस। मृतक ल न्याय दिलाए बर वोकर मां व रिश्तेदार मन ह हाईकोर्ट म याचिका दाखिल करे हे। ऐ मामला म सोमवार के जस्टिस प्रशांत कुमार मिश्रा के अदालत म सुनवाई होना रिहिस हे ।
नंबर नइ आए म कोर्ट ह सुनवाई 2 सप्ताह आगे बढ़ा दिस हे। इही प्रकार पूर्व एसडीएम अर्जुन सिंह सिसोदिया ह बिल्हा के सेवती निवासी किसान जीवनलाल मनहर ल धारा 107, 116 म जेल दाखिल करे के आदेश दे रिहिस हे। जेल म पिटाई होए ले किसान के मउत हो गिस। ये मामला म मृतक के पुत्र व पत्नी ह हाईकोर्ट म याचिका दाखिल करे हे। पूर्व एसडीएम के खिलाफ प्रकरण दर्ज करे अउ दफन शव के फोरेंसिक जांच करे के मांग करे हे। ये मामला ल हाईकोर्ट ह सुनवाई बर अगले सप्ताह रखे के आदेश दे हे ।
